Upprunalega bárust pistlahöfundi þessar skemmtilegu badminton minninga myndir gegnum Messenger spjall í lok janúar:

“Sæll og gott nýtt ár , var að skoða gamlar myndir hjá pabba, og fann gamlar myndir frá badminton móti, var bara að hugsa hvort þú vildir gera eitthvað með þær , þú ert svo flinkur að skrifa um margt frá Sigló. 👏👏🥰 Kveðja, Sigrun Johannsdottir.“

Hér er yfirlit yfir myndirnar sem voru teknar á tveimur Badminton Unglingameistramótum 1969 og 1970, þær birtast ykkur hver og ein og endurunnar í myndaalbúmum hér neðar í greininni.

Sjá meira hér af myndum og frásögnum um Tennis og badmintonfélag Siglufjarðar, TBS:

Sigrún fann þessar myndir þegar hún var í sínu sorgarferli að skoða gamlar myndir úr dánarbúi föður síns, Jóhanns J Halldórssonar, en hann lést 23 desember 2025. Hann var yndislegur maður, sem flestir Siglfirðingar þekkja best sem “Hanni Kokkur“.

Það litla sem við vitum um þessar myndir, er að þær berast heim í hús hjá Hanna og fjölskyldu, gegnum Ásgeir Gunnarsson, en hann var afi Sigrúnar í móðurætt. Ljósmyndarinn sjálfur er óþekktur en Ásgeir gæti sjálfur verið myndasmiðurinn á bak við nokkrar af þeim.

Við skulum hafa í huga að þetta eru “myndir af myndum,” sem eru 56-57 ára gamlar og greinilega teknar af ágætis áhugamanna ljósmyndar og líklega framkallaðar í heimahúsi ljósmyndarans óþekkta.

Við stafræna endurvinnslu hefur undirritaður forðast að laga þær of mikið og sést t.d. á nokkrum myndum að þær hafa verið undir plastfilmu í myndaalbúminu og plastið hefur skilið eftir sig rendur á nokkrum myndum.

Myndirnar eru börn síns ljósmynda tækni tíma og það mikilvæga er ekki endilega gæðin, heldur meira minningarnar sem birtast okkur í myndunum, hártíska og klæðaburður úr horfnum tíma. Stoltar stelpur og strákar, stilla sér upp fyrir myndatöku með badminton verðlaunapeninga o.fl.

Á myndunum sjáum við nokkra núlifandi og látna Siglfirðinga, en einnig krakka og fullorðna stjórnar karla/dómara, frá hinum og þessum badminton félögum Íslands. Undirritaður treystir sér ekki í að nafngreina fólkið eða aðgreina, hvaða myndir eru teknar 1969 eða 1970, en mér eldra fólk getur eflaust þekkt sjálfan sig og aðra og líklega lesið ýmislegt varðandi staðsetningu úr bakgrunninum á myndunum.

Það væri samt gaman að fá nöfn og upplýsingar frá lesendum og þá getur undirritaður uppfært greinina seinna. Auðveldast er þá að styðjast við titil og númer á myndum og senda upplýsingarnar til: trolli@trolli.is.

ATH. Smelltu á mynd og hún birtist þér stærri. Þar á eftir getur þú einnig flett fram og til baka gegnum allar myndirnar.

Tvö eintök af sömu mynd… smá framköllunarmistök. Það kom stundum fyrir að filmu ramminn snéri vitlaust í ljósmynda stækkaranum, í myrkraherbergi áhugaljósmyndarans og þá varð myndin á pappírskópíunni spegilvend, en sá sem tók myndina veit best hvor þeirra snýr rétt!

Undirritaður vill að lokum senda innilegar þakklætiskveðjur til Sigrúnar og eftirlifandi afkomenda Jóhanns J Halldórssonar, fyrir að leyfa okkur að sjá þessar myndir. Það er oft merkileg og sterk upplifun sem fylgir því að sjá horfin hversdagsleika og gamla vini, í gömlum svarthvítum ljósmyndum.

Höfundur samantektar og
stafræn gæða endurvinnsla ljósmynda:
Jón Ólafur Björgvinsson .

Sjá meira söguefni eftir sama höfund hér:
https://trolli.is/author/nonni/

Forsíðu ljósmynd:
Ljósmyndari: Sigrún Jóhannsdóttir.

Allar ljósmyndir eru birtar með leyfi frá eigendum og Ljósmyndasafni Siglufjarðar.