Pílufélag Fjallabyggðar stóð fyrir opnu pílumóti í gær þar sem lögð var sérstök áhersla á að blanda saman reyndum spilurum og nýliðum í skemmtilegri keppni. Fyrirkomulagið var tvímenningur þar sem einn vanur og einn óvanur mynduðu lið, en dregið var í pör eftir skráningu. Með því var tryggt að allir gætu tekið þátt, óháð reynslu, og skapaðist jafnræði sem skilaði sér í góðri stemningu.

Mótið hófst formlega klukkan 19:30 og alls tóku 26 keppendur þátt, þar af margir sem voru að stíga sín fyrstu skref í pílukasti.

Keppnin var jöfn og spennandi og að lokum stóðu Heiðar Gunnólfsson og Kristófer Beck Elísson uppi sem sigurvegarar. Í öðru sæti urðu Mikael Ingi Jónsson og Gunnar Óli Ármannsson.

Í svokallaðri „Forsetakeppni“ báru Ingimundur Loftsson og Óli Björn Þorvaldsson sigur úr býtum, en Egill Ólason og Kjartan Sindrason enduðu þar í öðru sæti.

Pílufélag Fjallabyggðar þakkar Kjörbúðinni fyrir veglega vinninga og öllum þeim sem mættu og tóku þátt. Ljóst er að mótið heppnaðist afar vel og að þátttakendur, jafnt nýliðar sem reynslumeiri, lögðu sitt af mörkum til að skapa góða og skemmtilega stemningu.

Myndir og myndbönd í fréttinni eru fengin af Facebook-síðu Pílufélags Fjallabyggðar.